I bin a Tichianer!!!

I werd‘ woch. Schau auf de Uhr. – Fünfe is‘! Wieda moi. Komisch, i werd‘ in letzta Zeit imma um Fünfe munter. Kaunn ned weiterschlofn. Nau daunn steh i hoid auf. Setz mi in die Kuchl und drah den Fernsea auf und check die hundatzwarafuchzg Programme, de ma UPC liefat (So, jetzt hob i UPC in da G‘schicht untabrocht, obwoi i von denan fia de Gratiswerbung kann Groschn, eigentli Cent, dafia kriag...) Schau im Telext, wia des Weda wiad.

Wos is eigentlch heit‘ fia a Tag? Ah! Freidog. Freidog, da Öfte. Mia foid ei, do is jo wos? Nur wos?

Da Öfte, da Öfte - sinnier i so vua mi hi. Und les‘ so nebenbei des Weda fia Wien:

„Ganztägig überwiegen die Wolken über der Stadt und zeitweise kann es leicht regnen. Der Wind bläst mäßig, teils lebhaft aus Nordwest bis Nord. Nachmittagstemperaturen um 7 Grad.“

Super! Wieda nix! Do kaunn i ned mit mein Freind, dem Otto, im Schanigarten vom Cafe Schwarz bei an Bier sitz’n. Zwoar kennt‘ i mit‘n Otto  im  Lokal sitzn. Oba des passt ma ned. Weil do wird z‘füh g’raucht. Do gibt’s kann ob‘getrenntn‘ Nichtrauchabereich. Des gaunze Lokal is a Rauchabereich! Stört mi normalerweis ned. Oba waunn i do stundenlaung sitz mitn Otto, stinkt daunn des Gwaund noch Tschick!. Pfui Teife!

Oiso nix mit’n Otto. Oba, do wor jo was! Nur wos? Da Fernseher is auf GoTV g’schoitn. Und do spütz grod Nine Inch Nails. De Nummer:“The Big Come Town“. A geile Scheim. De werd i ma aufs Handy lodn und dem Otto beim nächstn Bier vurspün. Der wird de Urwaschln aufstön!

Ob des is a ned. I mahn jez des mitn Otto. Und scho gor ned de Numma vo de Nine Inch Nails…

Irgendwos is heite. Heite aum öften. Aum Freitag… - nur wos.

Plötzlich steht de Christa in da Kuchltür. Schaut mi au und sogt. Kaunnst wieda ned schlofn?

Na, sog i.

Peda, sogt sie. Muasst amoi mit da Ärztin drüber redn. Um Fünfe aufsteh. Vuam Kastl sitzn. Stundenlaung. Und daunn se um Zehne Vurmittog wieda niedalegn und bis Drei schlofn. Des geht ned.

I schau sie nur au und überleg, obs des ernst mand. Se mands ernst. Denn imma wenns Peda zu mir sogt und ned Petzi, is ernst.

Leg die jez nieda, Pezi. Draht sie um, und dackelt wieda ins Schlofzimma

Ah! Sie is nimma ernst…

I bin in da Kuchl wieda alla. Nur da Koda sträunt um meine Fiaß. Der wü sei Fruahstuck. A Sackl Whiskas. Nau guat, i gibs eam.

I schoit de Kistn auf Puis 4 um – Frühstücksfernsehn. Und wos hear i? Da Modarator sogt:

Guten Morgen, meine Damen und Herren. Heut‘ haben wir Freitag, den elften März. Das Wochenende steht vor derTür.

Das Wochenende steht vor der Tür! I hör‘ ned weida.

Ned nur des Wochenende, sondan a no wos aundas. Oba nur wos. Mia foits ned ei.

Zum Ablenkn geh i aufs Klo Lulu. I muass ned, oba vielleicht foit ma beim Soarchn ei, was heit is. Mir foit oba nur ei, du bist ka Blitzgneissa. Ka Leichtn. Waunst ned wast, wos heit is.

Wia i ma de Händ wosch und des Pritschln vom Wossa hear. Foits ma ei.

Bin ich ein Trottl! Freitag is! Da Öfte! Heit, jo heit sperrt da Tichy auf!!!

Hau ma mit da flochn Haund auf de Stirn und bewunda gleichzeitig mei schene Fassad im Spiagl – Fescha Kamp’l…

Nervös putz i ma de Zähnd. Geh ins Schlofzimma. Leise, damit i de Chrstl ned aufweck‘, und ziag mi au.

Setz mi wieda aufn Kuchsessl und woat.

Do steht die Christl wieda in da Tiar. Sie woa a aum Klo. Schaut mi au und sogt: Wos mochst jez?

I grins sie au und sog: I woat. Um Zehne sperrt da Tichy auf. Do geh i hi und bestöh ma wia jedesmoi, waun im beim Tichy bin, an grossn Becha Haselnuss/Fiocco ohne Schlaug.

Peda, sogt sie wieda. Es is jo erst sechse!

I schau sie au und sog: I woat.

Se draht se um und wogld wieda ins Schlofzimma.

Auf GoTV spüns in David Bowie. Klass!

Nur mehr fünf Stund‘, bis da Tichy aufsperrt…